Ymer Nurka: Kënga e Çames

KËNGA E ÇAMES

 Zura një mike, Suliote,
Naze-naze, puna jote…
Populli

Siç ma kishte ënda, bëra asaj ane,
Renda për ty renda, moj e bukur çame,
Lule t’ergjënda, feksur mbi tumane,
Ç’ëndërr fshihet brenda, mos e thuaj xhane…!

Mos e thuaj xhane, ç’ëndërr brenda fshihet,
Dy a tre nishane, si drita mbi hijet…
Një raki prej thane, pij e nuk me pihet
Një tingull kambane, tutje seç po ndihet…

Me dy a tri nota, ajo diç më thotë:
- Sa hire fsheh bota, djal-o, s’i sheh dot,
Sa hëna të plota, gjysma duken sot…?!
Sa fjalë të kota, thënkemi më kot…

Me shtatin e gjatë, si Selvi -Janine,
Me gjinj të begatë, sumbulla-rubine,
Njomet buz’e thatë, njomet mbi burime,
Që rrjedhin nga lartë, pikëz e thërrime…

Ç’zemër-dashuruar, nuk deshi të lozi,
Moj gushëz-praruar, porsi abanozi,
Moj buz'-ëmbëlsuar, si mjaltë –ambrozi?!
Syri yt i shkruar, ç’më treti, ç’më sosi…


KENGA E ÇAMES

(variant i permbysur)

Zura një mike, Suliote,
Naze-naze, puna jote…
Populli
Bëra asaj ane, siç ma kishte ënda,
Moj e bukur çame, renda për ty renda,
Feksur mbi tumane, lule t’ergjënda,
Mos e thuaj xhane, ç’ëndërr fshihet brenda,!

Ç’ëndërr brenda fshihet, mos e thuaj xhane!
Si drita mbi hijet, dy a tre nishane,
Pij e nuk me pihet, një raki prej thane,
Tutje seç po ndihet, një tingull kambane…

Ajo diç më thotë, me dy a tri nota,
- Djal-o, s’i sheh dot, sa hire fsheh bota,
Gjysma duken sot, sa hëna të plota,
Thënkemi më kot, sa fjalë të kota…

Si Selvi –Janine, me shtatin e gjatë,
Sumbulla-rubine, me gjinj të begatë,
Njomet mbi burime, njomet buz’e thatë,
Pikëz e thërrime, që rrjedhin nga lartë…

Nuk deshi të lozi, ç’zemër-dashuruar,
Porsi abanozi, moj gushëz-praruar,
Si mjaltë–ambrozi, moj buz’-ëmbëlsuar?!
Ç’më treti, ç’më sosi, syri yt i shkruar…