Haxhi Muhaxheri: DIÇKA PO NDODH E DASHUR

Haxhi Muhaxheri

DIÇKA PO NDODH E DASHUR

E ndjej 
Diçka po ndodh 
E dashur
Rrugëtojmë 
Me shpejtësi drite
Udhës së Qumshtit 
Galaktikave
E me mikroskop jonik 
Shikohemi
Por heshtjen 
Nuk e thyejmë

Eta
As pluhuri kozmik 
Më nuk e shuan
Zjarrin e ndezur 
Brënda nesh

Futur jemi 
Labirintheve
Fushës magnetike 
Të mendjes
Dhe aty 
Ngritur e kemi 
Flamurin e bardhë
Se shpirti 
Na është zën peng
E kthim mbrapa nuk ka

Në gjakun e ndezur
Kapilarëve të zemrës
Ku hareshëm lozin 
Protonet neutronet
Nisi proçesi i ngjizjes
E përbrenda bërthamës
U shfaq një dimension i ri 
Për jetën

Eta
Tash edhe matematika
Humbur e ka imunitetin
Se me zero 
Dhjetra herë 
Shumëzuar të kam
Po përfundimi 
kurrë nuk më doli zero

Diçka 
Vërtetë ka për të ngjarë
E dashur
Shkatrruar janë magjitë
E dyshimi është mundur
Lum unë i lumi

Por... Dreqi e marrtë
Lodhur më kanë formulat
Ëndërrat keq më janë dehur
Koka në dysh më është ndarë
E sytë po më lën
Mjer unë i mjeri
Ç’po ndodh... 

Klinika mentale
Nuk pranon më pacient
Se çmendur janë 
Edhe mjeket
Lum unë i mjeri oh
Mjer unë i lumi

Kush më thotë
Sa është ora
Në ç’stinë jemi vallë
Po emrin... emrin si e pata...

08 dhjetor 2017